Jose Angel Iribar eta Andoni Egaña, Athletic Club Fundazioak “Makatza” liburuari buruz hainbat ikastetxetan antolatzen dituen solasaldietako protagonistak
Joan den asteartean, maiatzaren 27an, Laudio Ikastolak “Makatza” liburuaren inguruko Athletic Irakurketa Klubaren beste topaketa bat hartu zuen. “Makatza” Andoni Egaña bertsolariak idatzitako liburua da, Jose Angel Iribar “Txopo”ren haurtzaroa irudikatzen duena, bere jaioterrian, Zarautzen. Ikastetxeko DBHko 2. mailako ikasleek mito bihurtutako zuri-gorriaren pasadizoez gozatu ahal izan zuten eta liburuari buruzko galderak eta zalantzak giro atsegin eta parte-hartzailean argitu zituzten.
Jardunaldi oso arrakastatsua izan zen, aurretik eleberria irakurri zuten ikasleek galdera batzuk prestatu zituzten tertuliarako. Solasaldian zehar, Andoni Egañak “Makatza”ren idazketa prozesua xehetasunez azaldu zuen, eta Iribarrek, bere aldetik, bere kirol ibilbideko une garrantzitsuenak ekarri zituen gogora, gazteak bere pasadizo eta gogoetekin liluratuz. Legenda zuri-gorriak, gainera, hizkuntzaren garrantzia azpimarratu zuen eta euskaraz gehiago egitera animatu zituen ikasleak.
Saio hau Fundazioak Kultura Arloan garatzen duen Irakurle-on/a eta Athletic Irakurketa Kluba proiektuaren baitan kokatzen da.
Aurreko astearteko Irakurketa Klubaz gain, beste hainbat saio egin dira Euskal Herriko ikastetxe ezberdinetan, besteak beste, Larramendi Ikastolan, Unamuno BHIn, eta Ander Deuna Ikastolan. Hurrengo solasaldiak Markina BHIn eta Itxaropena Ikastolan izango dira, ekainaren 10ean eta 17an, hurrenez hurren.
“Makatza” liburua Athletic Club Fundazioak Euskal Herriko hainbat ikastetxetan doan argitaratu eta banatu dituen liburuetako bat da, irakurketa futbolaren mundura hurbiltzeko helburuarekin.
Aniztasun funtzionala
