Athletic Club Fundazioaren taldeak, Peña Genuine taldeak bikain babestuta, Lezaman ospatutako LaLigako Azken Faseaz gozatu du
Athletic Clubek anfitrioi lanak egin ditu asteburu honetan Lezaman ospatu den LaLiga Genuineko Azken Fasean. Arrakasta izugarria izan zen, jende asko bertaratu baitzen harmailetan bizi izandako giro bikainaz gozatzera. Jokalekua bikaina izan zen, Lezamako zelaietan futbolean jokatzen ari ziren 47 klubetako jokalariekin.
Baina benetako ikuskizuna zaleek eta, bereziki, Athletic Clubeko Peña Genuine taldeak eman dute. Sinestezinak dira. Taldearen hedapena jokalekutik haratago. Peña Genuine ezin hobeto irudikatzen du familia hitzak Athletic Clubentzat duen esanahia. Banderaz, bonboz, panderoz, danborraz, bozgorailuz hornituta… poza, ilusioa eta abegikortasuna oparitu dituzte asteburu osoan, Athletic Club anfitrioi ezin hobea bihurtuz.
2017/18 denboraldia hasi zenetik, desgaitasun intelektuala duten futbolariez osatutako Liga inklusibo hau etengabe hazi da. Egun, 47 klubek jokatzen dute lehiaketa, bi multzotan banatuta: Laguntasuna (Athletic Club Fundazioa bertan dago) eta Errespetua. Denboraldia 4 fasetan banatzen da eta 6 egoitzatan garatzen da, 2024/25 denboraldiko Azken Fase honen egoitza Lezama izan delarik.
Partidak 8 Futbolekoak dira eta bakoitzak 10 minutuko 4 zati ditu, baina emaitzak ez dira garrantzitsuak. Gozamena da Genuine jokalariek zein ondo pasatzen duten ikustea, futbolaz joko bat bezala gozatuz, lehiaketa bat bezala baino gehiago. Besarkadak, ospakizunak, kantak, barreak… eta baita dantzak ere. Izan ere, festa San Mamesera aldatu zen larunbat gauean, non musika ozen entzun zen eta neska-mutilek primeran pasatu zuten.
Jon Uriartek eta Jose Angel Iribarrek ez dute hutsik egin Genuine taldearekin Lezaman izandako hitzorduan, ikusleen artean beste bi athleticzale izan baitira. Zuzendaritza Batzordeko kide asko ere Azken Fasean izan dira: Nerea Ortiz, Jon Ruigomez, Jon Salinas, Josetxu Urrutia, Ainhoa Iza, Laura Ruiz de Azua eta Goizalde Santamarina, eta Johana Ruiz-Olabuenaga, Gizarte Arloko zuzendaria.
Azken finean, oroimenerako asteburua.
Athletic Clubek eta Fundazioak eskerrak eman nahi dizkiete bertaratutako publiko guztiari, LaLigako antolakuntzari eta boluntarioen taldeari Azken Fasea arrakastatsua izan zedin emandako laguntzagatik. Eskerrik asko bihotz bihotzez.
Lezaman astero entrenatzen duen taldea
Azken Fasea amaiera bikaina izan da, baina benetan garrantzitsua asteartero gertatzen da Lezaman, non jokalariek Fundazioko teknikarien aginduetara entrenatzen duten. Igor Arenazak, Eli Ibarrak eta Diego Feijook, gainerako talde teknikoko kideekin batera, futbola baino garrantzitsuagoa bihurtzen dute asteko saio bakoitza. Kirola egiteak dakartzan onurez gain, Genuine taldeko lehoiek kuadrilla bat osatzen dute taldean, maitatuak eta zoriontsuak sentitzeko ingurune bat. Azken batean, familia bat.
BBK Fundazioa, aurten ere, Athletic Club Fundazioaren Inklusio proiektu honen babesle izan da.
Aniztasun funtzionala
