Ekimen honi esker, tokiko agentzia, estudio eta diseinatzaileek Fundazioaren kultura-proiektuen irudi grafikoa sortuko dute
Athletic Club Fundazioak estrategia berri bat jarri du abian bere kultura-proiektuei lotutako kultura eta ikusizko sormena bultzatzeko. Thinking Football Film Festival eta Letrak eta Futbola jaialdien egungo edizioetatik aurrera, jaialdi bakoitzaren irudi grafikoa eta kartel ofiziala sortzeko ardura beste agentzia, estudio edo sortzaile bati emango zaio, edizio bakoitzerako berariaz hautatua.
Athletic Club Fundazioko eta Athletic Clubeko Marketin Saileko ordezkariek osatutako batzorde batek egingo du hautaketa. Batzorde honek sormen-arloko erreferentziazko profesionalak hautatzen ditu deialdi bakoitzean, jaialdien ikus-identitatea garatzeko.
Ekimen honekin, kartelak egileek sinatuko dituzte, haien dimentsio artistikoa indartuz eta sortzaile edo agentzia bakoitzaren adierazpen pertsonal bihurtuz. Proposamen bakoitzak bere ikus-unibertsoa, sormen-hizkuntza eta Athletic Club Fundazioaren balioen interpretazio berezia islatzen ditu, bai eta Athletic Clubaren identitatearena eta irudiarena ere.
Vedia agentziak etapa berri hau inauguratu du Thinking Football-ekin (2026)
Lan-ildo berri honen lehen erakusketa Thinking Football Film Festival 2026ko edizioaren kartela izan da. Haren ikus-identitatea Vedia agentziak garatu du. Bere proposamenak etapa berri bat inauguratu du, non edizio bakoitzak ikuspegi sortzaile propioa eta bereizia izango duen.
Estrategia honen helburua da Bizkaiko ekosistema sortzailea indartzen laguntzea, diseinu grafikoko, ilustrazioko eta ikus-komunikazioko profesionalentzat ikusgarritasun-aukerak sortuz eta kulturaren, kirolaren eta sorkuntza garaikidearen arteko elkarrizketa ezarriz.
BertsoDerbia, IES Ibarrekolanda BHIrekin lankidetzan
Tokiko talentu sortzailearen aldeko apustu hau BertsoDerbia proiektura ere hedatzen da. Edizio bakoitzaren kartela Bilboko IES Ibarrekolanda BHI ikastetxe publikoko Publizitate Grafikoko zikloko ikasleek garatuko dute, Euskadin ikus-komunikazioko eta diseinu grafikoko profesionalak prestatzeko erreferentziazko zentroetako bat. Eredu berri honen barruko lehen esperientzia Martxel Mendizabalek BertsoDerbiaren irudi ofizial gisa egindako proposamenarekin amaitu da.
Zinema
