600 pertsona inguru bildu dira Lezaman, “Futbola buruan” BOMS proiektuaren urteroko festaren zortzigarren edizioa dela eta
Aurten ere, Athletic Club Fundazioak eta Osakidetzako Osasun Mentaleko Sareak 600 pertsona inguru bildu dituzte Lezaman, osasun mentalaren aldeko proiektu bateratua antolatzeko. 2014an hasi zen elkarlana da hau, kirola osasun mentaleko arazoak dituzten pazienteen prozesu terapeutikoan funtsezko tresnatzat jotzen duena. “Futbola buruan” asteroko entrenamendu-denboraldi oso bati amaiera ematen dion ekitaldia da, urtero-urtero egiten da Lezamako zelaietan, jai eta jolas giroan. Helburua parte-hartzaile bakoitza ekimen honen benetako protagonista sentitzea da.
2025ean, “Futbola buruan” ekimenaren zortzigarren edizioa ospatu da, eta erabiltzaileak ez ezik, proiektuaren arduradunak, senideak eta boluntarioak ere bildu ditu. Hauek izan dira parte hartu duten erakundeak: Osakidetzako BOMS, Eragintza, Argia, Avifes, Asasam, Gizakia, Emaus, Gijongo Real Sporting eta OMS Gasteiz.
Goizean zehar egin den jardunaldian, bi kirol-jarduera nagusi antolatu dira:
- Walking Football txapelketa. Geurea Liga (Euskadiko Osasun Mentaleko Zentroen Arteko Areto Futbol Liga) amaitu ondoren, parte hartzen duten taldeek eta futbolari berriek sailkapenik eta puntu-banaketarik gabe jokatuko dute txapelketa hau, ondo pasatzeko helburu bakarrarekin. Futbol inklusiboa Walking Football modalitatean, oinez eta lesioak saihestuz.
- Multikirola. Intentsitate ertaineko ariketa fisikoko saioak eta taldean egiten diren askotariko jolasak, gozatzeko eta ondo pasatzeko asmoz.
Gainera, parte hartzaileek piknik batez gozatu ahal izan dute, baita “Futbola Buruan” ekimeneko kamiseta oroigarri bat etxera eraman ere. Kamiseta horren diseinua DISORDER WAVEk egin du, irabaziak baliabiderik gabeko pertsonentzako terapia psikologikoko minutuetara bideratzen dituen arropa-marka.
Athletic Club Fundazioko kirol teknikariekin eta Osakidetzako osasun mentaleko profesionalekin batera, Johana Ruiz-Olabuenaga, Athletic Clubeko Gizarte Arloko zuzendaria; Jose Ignacio Landaluce, Ana Isabel Rodriguez, Juan Luis Lapuente eta Maria Estrella Garrido Osakidetzaren izenean; eta Izaskun Landaida, Eragintzaren aldetik, egon dira.
Kirola, balioan eta humanizazioan oinarritutako arreta
Osasun Mentaleko Sarea osasun mentaleko pazienteei zuzendutako proiektua da, 14 urtetik gorakoak diren eta, gehienek, buruko nahasmendu larriak dituztenak.
Astero, areto futboleko, Walking Footballeko eta multikiroleko hainbat entrenamendu egitean datza proiektua. Entrenamenduak Osakidetzaren Eguneko Zentroetan eta euskal osasun publikoko sarearekin lotutako beste elkarte batzuetan garatzen dira, Athletic Club Fundazioko teknikariek zuzenduta.
Taldean kirola egitea osasun mentaleko arazoak dituzten pertsonen errekuperazio integraleko prozesuaren parte da. Forma fisikoa hobetzen, sindrome metabolikoari aurre egiten eta ohitura osasungarriak hartzen laguntzeaz gain, ingurune komunitarioan pertsonen bizi-proiektuak garatzen ere laguntzen du, bakardadeari aurre eginez eta kolektibo horrek pairatzen duen estigma sozialaren aurka borrokatuz.
Hiru kontzeptu dira funtsezkoak proiektu honetan: kirola tresna terapeutiko gisa erabiltzea, balioan oinarritutako arreta eta humanizazioa.
Athletic Clubek, gainera, kirola bera bezain garrantzitsua den onura bat eskaintzen du: inklusio eta normalizaziorako motor gisa duen gaitasuna. BOMS edo Futbola Buruan bezalako ekimenei esker, Athleticek gaixotasuna ikusgai bihurtzen du, desinformazioari aurre egiten dio, talde-nortasuna ematen du eta gaixotasun mentala duten pertsonek sentitzen duten apatiaren aurkako botika gisa funtzionatzen du.
Osasun mentalaren aldeko proiektu aitzindari honetan Athletic Cluben eta Osakidetzaren arteko lankidetza instituzionalak errekonozimendu garrantzitsuak jaso ditu azken urteotan, besteak beste, Erizaintza Garatzeko Fundazioaren sariak, Euskaliten “Epe laburreko kudeaketa” eta Humans Fundazioarena, osasun-arloko eta arlo soziosanitarioko profesionalek eta erakundeek osatutakoa.
Osasuna
