Athletic Club Fundazioko teknikariek astean behin bi talde misto entrenatzen dituzte, 5 eta 17 urte bitartekoak, gizarteratzeko proiektu honetan
Nico Williamsek Fidias Fundazioaren zentroa bisitatu berri du Lamiakon. Horrela, Athletic Clubeko lehoiak Fidiasen lana eta Athletic Fundazioarekin batera bultzatutako proiektua bertatik bertara ezagutzeko aukera izan du. Gizarteratze-proiektu bat da, kalteberatasun-egoeran dauden adingabeei zuzendua. Astero, teknikari zuri-gorriek zuzenduta, bi talde mistok (5-14 urte eta 14-17 urte) Lamiakoko zentroan entrenatzen dute, kirolaren eta kulturaren bidez gizarteratzea sustatzeko helburuarekin.
Gainera, Fidias proiektua GarATHuz programaren bairako proiektuetako bat da, eta harrobiko gazteen prestakuntza integrala du helburu. Horrela, Lezamako talde bakoitza Athletic Club Fundazioak Komunitate, Inklusio eta Kultura arloetan burutzen dituen proiektuetako batean inplikatzen da, formakuntza integraleko prozesu honetan gure lehen taldeetako jokalarien babesa izanez.
Fidias proiektuaren kasuan, aukeratutako taldeak alebin kategoriakoak dira, eta haien aitabitxiak Yuri, Berenguer, Oguiza eta Quiñones dira. Hemendik aurrera, Nico Williams ere gizarteratze proiektu honen aitabitxi berri bilakatu da. Gainera, @thegrefg eduki sortzailearekin batera bisitatu zuen Fidias Fundazioa.
GarATHuzen jarduera aipagarrien artean, adibidez, nabarmendu behar da 2013ko kimuek ere in situ ezagutu zutela Fidias Fundazioa Lamiakon, eta bertan azaldu zitzaiela proiektuaren funtzionamendua eta fundazio baten eginkizuna. Gainera, txalaparta protagonista izan zen esperientzia kultural batean parte hartu zuten: Fidiaseko haurrek erakusketa txiki bat eskaini zuten eta alebinak animatu zituzten bat egitera.
Azkenik, aipatzekoa da Fidiaseko haurrek alebin zuri-gorrien bisita itzuli dutela eta Athletic Club Fundazioko teknikariek lagunduta Lezama ezagutzeko aukera izan dutela.
Aniztasun funtzionala
