Athletic Club Fundazioaren kultur jaialdiak 19:00etan irekiko ditu ateak San Mames VIP Areako Ekialdeko Aretoan
Gaur, asteartea, ‘Letrak eta Futbola’ jaialdiaren XVII. edizioa hasiko da 19:00etan. Athletic Club Fundazioak antolatutako jaialdiak inaugurazio-saio batekin emango dio hasiera, eta futbolaren irudien indarrari buruz solasean arituko diren gonbidatu nabarmenak hartuko ditu: Enrique Vila-Matas, Paco Gómez eta Marta San Miguel. Edukiera bete arte sarrera doakoa izango da, eta gaurtik maiatzaren 30eko larunbatera arte, San Mameseko VIP Areako Ekialdeko Aretoa literatura eta kulturaren zaleentzat ezinbesteko topagune bihurtuko da. Sarrera, 14. atetik.
Irudiak eta futbola
Enrique Vila-Matas literatura espainiar garaikideko idazle ezagunenetako bat da. Bere lanak fikzioa, saiakera eta gogoeta literarioa uztartzen ditu, beste egileekiko eta idazketaren ekintzarekiko erreferentzia etengabeekin. Bere eleberri esanguratsuenen artean daude “Bartleby y compañía“, “El mal de Montano” edo “París no se acaba nunca“. Bere ibilbidean sari ugari jaso ditu estatu mailan eta nazioartean, eta bere lanak hainbat hizkuntzatara itzuli dira.
Harekin batera parte hartuko du Paco Gómez argazkilari, editore eta idazleak, bereziki “Los Modlin” (2013) lanagatik ezaguna. Proiektu horrek ikerketa, argazkigintza eta kontakizuna uztartzen ditu Madrilen abandonatutako familia-artxibo baten aurkikuntzatik abiatuta. Bere lana argazkigintza dokumentalaren, memoriaren eta narratibaren arteko mugan kokatzen da.
Horrez gain, Marta San Miguel eleberrigile, kazetari eta gidoilaria mahai-inguruan izango da. Bere lehen eleberria, “Antes del salto”, 2022ko debut lanik onenen artean hautatu zuten hainbat hedabide espezializatuk.
‘Letrak eta Futbola’
‘Letrak eta Futbola’ Athletic Club Fundazioak antolatutako kultur jaialdia da, Meliá Bilbao hoteleko babes berezia eta Espainiako Kultura eta Kirol Ministerioaren laguntza dituena.
